Хайрхан уулын бараа

Хайрхан уулын бараа

Сэвшээ хонгор салхиараа илбэн
Сэвлэг даахийг минь сэрвээж торниулсан
Цэрвүү шиг холоос санаашран суухад
Сэтгэл дотор минь тодорхой байдаг

Хайрхан уулын барааг
Харах бүр минь жаргал юм аа
Хайртай буурал аав ээждээ
Очих бүр минь заяа юм аа

Нутаг усаа шүтэж явахын
Нууцхан хайрыг өвгөдөөсөө өвлөсөн
Нуурын шувууд шиг дуулаад мордовч
Нулимстай нүдэнд минь илхэн байдаг

Хайрхан уулын барааг
Харах бүр минь жаргал юм аа
Хайртай буурал аав ээждээ
Очих бүр минь заяа юм аа

Дэвэн нисдэг жигүүртэн хүртэл
Дэнж нууранд аа өнжин хоргоддог
Дэргэдийн нөхөр нэрийг нь хэлэхэд
Дээж айргийнх нь үнэр сэнгэнэдэг

Хайрхан уулын барааг
Харах бүр минь жаргал юм аа
Хайртай буурал аав ээждээ
Очих бүр минь заяа юм аа

Ангир нүдэн Мөндөөхөө

Ангир нүдэн Мөндөөхөө

Ай даа аялгуут Мөндөөхөө
Ангирын нүд шиг зүүдлэгдэв үү
Альхан ч нутгаас санана би
Аньсганд солонготой нуур минь ээ

Ай даа манант Мөндөөхөө
Уул нь цэнхэр зүүдлэгдэв үү
Өнгөн шувууд нь намраа мартсан
Өрөнгийн хаялгатай нуур минь ээ

Ай даа зэрэглээт Мөндөөхөө
Зээрийн нүд шиг зүүдлэгдэв үү
Зэрвэс зэрвэс салхи нь дуулахад
Зэгсний хөөмийтэй нуур минь ээ

Ай даа зүрхний Мөндөөхөө
Дэрийг л норгож зүүдлэгдэв үү
Дэлхийн хаанаас ч дурсана би
Сэтгэлийн уянгатай нуур минь ээ

Дуучин Түвшинтөгсийн дуулсныг сонсож байгаад бичлээ. Өнгөн шувуу Өрөнгийн хаялга гээд мөн өөр бусад үгийг ташаа бичсэн бол хүлцэл хүсээд засаж залруулсан тайлбар оруулна гэдэгт бат итгэж байна.